तनहुँको भिमाद बजारबाट उकालो लाग्दै गर्दा जब शीतल हावाको झोक्काले मुहार सुम्सुम्याउँछ, तब बुझ्नुहोस्— तपाईं एउटा यस्तो धर्तीमा टेक्दै हुनुहुन्छ जहाँ प्रकृतिले आफ्ना सारा रङहरू पोखेकी छिन्। हरिनास गाउँपालिका वडा नं. ४ मा अवस्थित ‘चित्रे’ केवल एउटा गाउँ मात्र होइन, यो त पहाडको काखमा सजिएको एउटा सुन्दर कविता हो। थुम्कामा मिलेर बसेका घरहरू, आँगनमै आइपुग्ने कुहिरो र क्षितिजमा देखिने माछापुच्छ्रेको चाँदीझैँ टल्किने मुस्कानले यहाँ पुग्ने जोकोहीको हृदयमा एउटा अमेट छाप छोडिदिन्छ।
बिज्ञापन
बिज्ञापन
पौरखी लाहुरेको गाउँ: रगत र पसिनाको प्रतिविम्ब चित्रे भञ्ज्याङलाई ‘लाहुरेको गाउँ’ भनेर चिनिन्छ, तर यो नामले मात्र यहाँको गरिमा थाम्न सक्दैन। यहाँको समृद्धि कुनै सरकारी बजेटको उधारो आश्वासनमा ठडिएको होइन। नेपाली सेना, भारतीय सेना र ब्रिटिस सेनामा आबद्ध वीर गोर्खालीहरूले पल्टनको कठिन जिम्मेवारीका बीच साचेको पुँजी र विश्वव्यापी अनुभव नै यस गाउँको मेरुदण्ड हो। सैनिक सेवाबाट अवकाशप्राप्त वीरहरूले आफ्नो रगत र पसिनालाई मातृभूमिको माटोमा मिसाएर यो बस्तीलाई स्वर्ग तुल्य बनाएका छन्। यहाँका हरेक पक्की घर, सफा र चौडा सडक अनि सुसज्जित विद्यालयहरूमा एउटा सैनिकको त्याग, अनुशासन र समर्पणको गाथा सुनिन्छ।
गर्मी छल्ने शीतल आश्रय: छिमेकी जिल्लाको रोजाइ जब तराई र बेंसीहरूमा सूर्यको रापले जनजीवन अस्तव्यस्त हुन्छ, तब चित्रे एउटा शीतल छहारी बनेर खडा हुन्छ। पछिल्लो समय तनहुँ, स्याङ्जा, कास्की र आसपासका पालिकाहरूबाट गर्मी छल्न आउने आन्तरिक पर्यटकहरूको यहाँ घुइँचो लाग्ने गरेको छ। भिमादको रापिलो गर्मीबाट केही मिनेटको यात्रामा पुग्न सकिने चित्रेको ठन्डा मौसम र लेकाली हावामा रमाउन मानिसहरू लालायित हुन्छन्। हिमालको दृश्य हेर्दै यहाँको शीतल ओतमा बस्दा लाग्छ, प्रकृतिले आफ्ना सन्तानका लागि यो ठाउँलाई विशेष फुर्सदमा सिर्जना गरेकी हो।
बिज्ञापन
विविधताको सुन्दर फूलबारी र सुन्तलाको सुगन्ध चित्रे विभिन्न जातजाति र संस्कृतिको एउटा साझा संगमस्थल हो। यहाँको जातीय सद्भाव र सांस्कृतिक वैभवले यसलाई एउटा जीवन्त फूलबारीको रूप दिएको छ। हिउँद लागेसँगै पहाडका पाखाहरू लटरम्म फलेका सुन्तलाले पहेँलपुर देखिन्छन्। सुन्तलाको त्यो मिठो सुगन्धले पूरै गाउँलाई मदहोस बनाउँछ। स्थानीय अर्ग्यानिक स्वाद, कोदोको ढिँडो र पहाडी आतिथ्यताले पाहुनाहरूलाई यस्तो स्नेह दिन्छ कि उनीहरू यहाँबाट फर्कँदा मन चित्रेमै छोडेर जाने गर्छन्।
पर्यटनको नयाँ क्षितिज गाउँपालिकाको कार्यालय नजिकै रहेको र प्रशासनिक रूपमा सुगम भए पनि चित्रेले आफ्नो मौलिकतालाई भने गुमाएको छैन। विकास र प्रकृतिको यस्तो सन्तुलन बिरलै भेटिन्छ। हिमालको काखमा बसेर लाहुरेको आँगनमा सुन्तलाको स्वाद लिँदै पहाडी जीवनको मधुरस पिउन चाहनेहरूका लागि चित्रे एउटा उत्कृष्ट गन्तव्य हो। तपाईं पनि एकपटक चित्रेको यो दिव्य यात्रामा निस्कनुहोस्, जहाँ हिमालले तपाईंलाई स्वागत गर्नेछ र लाहुरेको आँगनले तपाईंको थकान मेट्नेछ।
