स्याङ्जा । स्याङ्जाको हरिनास गाउँपालिकाले पछिल्लो समय बढ्दै गएको डढेलो र आगलागीका घटनाप्रति गम्भीर ध्यानाकर्षण भएको जनाउँदै सचेत रहन स्थानीयवासीमा अपिल गरेको छ। गाउँपालिकाका अध्यक्ष खिम नारायण मानन्धरको सचिवालयले एक सार्वजनिक सूचना जारी गर्दै वन र बस्ती जोगाउन सबैलाई जिम्मेवार बन्न आग्रह गरेको हो।
बिज्ञापन
विगत केही दिनदेखि गाउँपालिकाका विभिन्न स्थानहरूमा डढेलो लाग्ने क्रम बढेको र यसले प्राकृतिक सम्पदाको विनाश गर्नुका साथै मानवीय बस्ती समेत जोखिममा पारेको सचिवालयले जनाएको छ। आगलागीका कारण वन क्षेत्र सखाप हुने र धनजनको सुरक्षामा ठूलो चुनौती थपिएको भन्दै गाउँपालिकाले यस्ता गतिविधिमा संलग्न नहुन चेतावनी दिएको छ।
बिज्ञापन
सूचनामा भनिएको छ, “कसैले पनि जानीजानी वा लापरबाहीपूर्वक आगलागी नगर्न र नगराउन विनम्र अनुरोध गरिन्छ। यदि कसैले नियतवश आगलागी गरेको पाइएमा प्रचलित कानुन बमोजिम कडा कारबाही गरिनेछ।” गाउँपालिकाले डढेलो लगाउने कार्यलाई गैरकानुनी र विनाशकारी कदमको रूपमा व्याख्या गरेको छ।
यसैगरी, गाउँपालिकाले नागरिकहरूलाई एउटा जिम्मेवार छिमेकीको भूमिका निर्वाह गर्न समेत आह्वान गरेको छ। आफ्नो वरपर कतै आगलागी भएको देखेमा वा कसैले आगो लगाउन खोजेमा तुरुन्त स्थानीय जनप्रतिनिधि वा नजिकैको प्रहरी चौकीमा खबर गर्न अनुरोध गरिएको छ। प्राकृतिक स्रोतको संरक्षण गर्दै आफ्नो गाउँलाई सुरक्षित राख्ने अभियानमा सबैको साथ अपरिहार्य रहेको सचिवालयले उल्लेख गरेको छ।
बिज्ञापन
